Home / Cerpen / Meusigrak

Meusigrak

Oleh: Qusthalani

Buleun meuganto buleun, thon meuganto thon. Ma’e lam jambo khop yang kageubangun lam masa Aceh beurethoh budè tam tum, tan meuganto meu aleu pih. Si gam nyan that gasèh atè, ngen jroh lam gampong nyan, tan peurnah ji meungeluh akan udèp lagenyan rupa. Tapi oh ureung gampong kaleun, meu sieèt lam hate geujak bantu Bang Ma’e nyan. Semangat udèp di gobnyan payah taboh lumboi siploh, tan meubacut meungeluh. Sabè lam syukô, geu kereuja uroe bengöh keu aneuk binoe.

Uroe nyan angèn laot di pot meu sap sap meurasa lam kulèt. Ubeu ine bulé dibeudöh, ke peutanda bahwa uroe nyoe sép leupi tarasa lam dada. Ureung bineuh laot takalen meubanja lam kapai laot tengôh geuptren ungkot.

Hasé kali nyo brat kureng, Mando”. Ma’e bak ujong kapai teungeh geupegah haba ngeun bang Mando. Abang nyan na keuh pawang bot nyan teungöh geupetrön eungköt le bang Ma’e.

Nyoe keuh Ma’e, nyoe karap angén barat. Ungkot pih sang ka malèè jak meusapat bak geutanyo”. Mando sira geumayang ngen bang Ma’e, geupantoi bot-bot nyang teungöh geupetren hasé meu jareng beuklam.

Nibak akhéé thon memang di Koeta Radja ungkot agak kureung. Nanggroe di ujong pulo sumatera nyo di thei ban sigom donya, nakeuh saboh daerah nyan leu that hasé ungkot. Menyo bak ujong thon, na saboh musém geukhen ngen musém angén barat. Nibak bulön nyan uröng meu laot geupiyoh siat geujak peu langue bot u samudera. Pawang göt that muphom bahwa ungköt nibak bulön nyan ji plueng saboh saho. Adak geutiek jaréng, ungkot pih malé-malé miong. Han di peutoi meu si hah pih. Nyak bek geuwo soh, di ureng meulaot kakeuh geupiyoh di rumoh manteng. Geupubut pu-pu nyang patot keu asoe prue aneuk ngen peuremoh.

Ma’e…ma’e….nyoe na pulot saboh punjot. Keno kajak, bek gadoh ka meulamun disinan”. Bang Lah geu tawok-tawok bang Ma’e dari bunoe hana geujaweb. Rupajih Bang Ma’e teungeh geumelamun, geupike nasib 3 buleun uke sabab katroh angen barat. Teungeh geupike pu nyang jet geupubut, bah na jajan sinyak agam dijak sikula singeh. Bang Lah, nan nibak KTP gobnyan na keuh Abdullah Bin Husen. Di ngen gob nyan seureng geu tawok Bang Lah. Ureng raya panyang, itam klet aseli warna kulet ureng Aceh. Meubrewok, bule dada get that jai lage lam uten raya. Tapi akai bek tanyeung, that jroh lage aulia tujoh. That geumaseh lam kawan rame. Gobnya rakan meutuah Bang Ma’e, sereng geutulong bang Ma’e oh na masalah lam udep.

Get Bang Lah, nyoe kutulak raga ungkot nyo ile bak TPI. Siat trek ka wate lelang ungkot. Bek gedhot le Mando entrek. Hana ta tuho keunip”.

Bang Ma’e geutulak padup-padup boh raga ungkot nyang ka geupileh buno ken. Dak pih pruet that krek krok ka, tapi kereja nyan utama. Dak pieh gasien, bek ta sia-siakan pu nyan ka geu petanggong jaweub nibak geutanyo. Nyan prinsip lam udep Bang Ma’e, maka di gob nyan wie uneun ube na rakan sereng geupakat keureja. Sabab goh lom na nyan kecewa ngen keureja bang Ma’e.

Lheuh geutulak raga ungkot nyan, Bang Ma’e geuperap Bang Lah. Geupesan kupi pancong saboh glah, pulot saboh punjot. Lheh geu jep kupi saboh teugok, bang Lah hireun geukalen Bang Ma’e nyan dari buno seungap manteng kalage ureng meucewek kedeh. Ureng ban na cewek, manteng male-male han geutejet marit dua jih.

Hai Ma’e pu sengap that kah mulai buno”, Bang Lah geumesu ube na raya, sang-sang jen yang deunge manteng diplueng beuretan han di deng le.

Nyo….bang Lah, nyooo. Pu reuh ku neuk peugah buno ka tuwe kuh”, Bang Ma’e lage ret roh bak geujaweb bang Lah.

Hai Ma’e ka peugah aju pu kaneuk peugah, kadang jet kutulong keuh”. Bang Lah bak hi that serius, hireun geuh pu geunek tanyeng le bang Ma’e.

Buno bang Lah, bang long peutren ungkot nibak bot Mando. Lon kaleun ungkot jih that beda lage biasa. Sang meu keu bot hansep, bek tapeugah keu getanyo”.

Bang Ma’e ngen ie muka lumoh menan, geucuba peugah asai mu asai gobnyan apoh apah mulai buno. Bang Ma’e teungeh geupike ngen ungkot dup nan rupa, pu na keuh raseki Mando atawa gob nyan. Dup tingkat uroe nyo manteng lageu nyo, kiban keuh ukeu.

Bang Lah yang raya panyang nyan geubeudeh sira geu tumpang keu ieng ke peh meja. Rap patah meuja keude kupi kak Nah.

Hai Ma’e bek kajak peumale long keuno, long kuturi gata ureung nyan tingat keu Allah. Rasekinyan keun tanyo jak pike, beudeh beu meusigrak pubut pu-pu nyang patot. Uroe nyo nakeuh dup no raseuki tanyo, singeh ta usaha lom, bek jak meugadoh jak pike pu tapajoh singeuh. Asai na usaha InsyaAllah raseki na, nyan janji Allah nibak geutanyo”.

“Jino Ma’e, jak tajak bak TPI. Tajak bantu Mando bah ungkot nyan bagah lewat. Tanyo jet bagah tajak wo, uroe pih rap ipet keutanda meugreb rap teuka”. Bang Lah ngen bang Ma’e meu banja keujak bak tempat peulelangan ungkot. Raga-raga nyang na keu peudong meuriti nibak bineuh jalan, na cit yang di dalam bak toke untuk geu leulang keu toke-toke eungkot laen.

Lelang ungkot di Nanggroe Aceh Darussalam mubeda bacut ngen daerah-daerah laen nyang na di Indonesia. Aceh Seuramo Meukkah hana mupakek teungkulak nibak meulelang ungkot nyan. Pawang ngen toke bot, Cuma geulelang langsung ke so-s- yang bloe ungkot nyan untok geupebloe lom atawa geu olah pu pu nyang patot. Na saboh trek yang unik nibak leulang ungkot disino, nakeuh na kode geubi le po leulang ngen su lonceng. Meunyo sigo nyan na arti jih leulang ungkot ka dimulai. Nakeuh meunyo lonceng geu peumusu dua go, nyan na arti leulang ungkot kajet piyoh. Ungkot kajet publoe lage yum biasa bak pasai ungkot tradisional.

Sikilo dua ploh, siploh kilo 150 ribe, ungkot meutuah that mameh asoe menyo ta peulemak ngen santan atawa tapanggang ngen rakan di gampong”. Bang Lah ngen su meutaga lage tambo meulasah, ka geu mulai lelang ungkot bak bineh jalan lam TPI. Ungkot na siploh boh raga nyan ka geupetren buno, ungot nyan beu ka meu peu po lam wate kureung leubeh nam ploh minet. Nyan cit piasan bang Lah ngen Bang Ma’e tiep uroe Tuhan.

Bang Lah, menyoe kamo cok meu lhee boh raga padup yum di ungkot nyan”, na sidroe langganan ureng agam raya panyang nyan, Kak Dara nan geuh. Di gob nyan geubloe ungkot untuk geujak mugee lom di gampong-gampong. Adak sidroe ureung inong balee, jak mugee ungkot nyan nakeuh hai biasa. Nyang penteng raseuki haleu geu puwo keu aneuk di rumoh.

Nyan ta timang lee hai cut kak Dara, padup kilo ideng. Menyo keudroe neh, tetap kamo bri harga spesial. Pulom digata hai cut kak, ka lhee thon meu langganan ngen long”. Bang Lah sira geupekaru Kak Dara, geu timang aju ungkot nyan.

Nyan neukalen cut kak, jarom kilo nyo itunyok bak dua ploh kilo saboh-saboh raga. Man neu kali aju lhee boh raga padup kilo, keu cut kak lon bi harga tujoh reutoh manteng. Kiban jeut”. Bang Lah ka geumulai buka harga.

Kureng bacut trek, hai bang Lah. Limong reutoh kiban”. Kak Dara geumulai tawar.

Boh ka, keu cut kak lon bi nam reutoh limong ploh. Nyan bek neutawar le cut kak. Mahan lon tulak keu bang Kapluk di sampeng droe neuh”. Bang Lah ngen bibi itam nyan, geu senyum-senyum mameh. Sang nibak hi, uroe reudok nyan meu kilat cahaya.

Kak Dara, hana geubasa basi geuyu bungkoh aju ungkot lhee boh raga nyan. Tawa meunawa harga, nakeuh saboh piasan nibak meulelang ungkot. Menyo jet geu peumurah lom pakeun han. Man menyo hanjet le, payah tayue bungkoh aju. Mahan ka beh teuh, geutulak keu ureng laen nyang na nibak tempat nyan. Kak Dara get that muphom nibak piasan lelang meu lelang nyan.

Bang Lah, ungkot gantuep ngen kerape pu na meu saboh raga”, tiba-tiba lam lungkiek ureng rame Kak Dara geubalek lom.

Hana uroe nyoe kak dara, ci neutanyeng bak bang Ma’e. Bunoe keun na meu sikhan raga bak gobnyan”. Sira geutunyok arah uneun bang lah geutawok bang ma;e.

Kak Dara, Cuma na limong kilo treuk sagai ungkot keurape. Na tujoh kilo ungkot gantuep. Pu neu cok kedroe neuh mandum.Bah lon paso laju lam plasti, hana lon lelang lee”. Bang Ma’e sira geuboh laju ungkot nyan lam plastik, adak pih Kak Dara teungeh geuseumikee seumikee.

Boh ka, bang. Neubalot aju. Daripada hana, sabab leu nyang lakee baro”.  Peng on sireutoh wareuna mirah na meupadup on ka lam jaroe bang Ma’e. Ungkot nyan pih hana trep, ka meupinah lam keulindeet kak Dara.

Hie uroe geut that supot ka, mata uroe pih ka geut meusalob le awan itam. Rupajih reudok geut that itam, lagee hie han ithen lee langet. Nyan awan nyan nibak hi keunek reuet u bumo, ie ube iek sidom ka ret bacut-bacut.

Ting…ting…ting”. Lonceng keu peutana nyang bahwa watee lelang ka beh. Nyan ungkot hanjet publoe le, nyan aturan yang ka geu seupakati meu padup abad nyang ka ulikot.

Mae, Bang Lah. Kajeut piyoh. Keuno meusapat droe bak keude kak Nah. Na raseuki bacut ta cok, beujeut ke syufaat ke aneuk peuremoh”. Mando, dari jioh geu tawok ureng nyang geumaseh nyan man dua.

Angen laot geut that dipot, lupie pih lagoi na. Ujeun nibak hie ret laju-laju, raya laju-laju. Bang Lah geu peudieng laju Bang Ma’e geu gah honda meu taga. Lheh geucok raseuki bacut bak Mando, honda nyan laju geubalap. Gadeuh bacut-bacut nibak pandangan Mando nyang manteng geu keumira hasee lelang ungkot nibak uroe nyoe.[]

 

*cerpen tersebut merupakan salah satu cuplikan dari kumpulan cerpen Aceh meusigrak. Ada puluhan cerita lainnya, dengan nuansa kedaerahan provinsi Aceh. Penasaran, pesan aja pada penerbit jejak publisher atau penulis terdekat anda.

About Redaksi

Check Also

Pengambilan Keputusan sebagai Pemimpin Pembelajaran

3.1.a.7. Demonstrasi Kontekstual – Pengambilan Keputusan sebagai Pemimpin Pembelajaran Oleh : Vonna Rohaza, S. Pd. …

Tinggalkan Balasan

Alamat email Anda tidak akan dipublikasikan. Ruas yang wajib ditandai *